Rrugë të reja në Alpet e Shqipërisë, lidhet kontrata 3.63 mln euro

Përmirësimi i aksesueshmërisë dhe infrastrukturës së turizimit të aventurës në Alpet e Shqipërisë”.

Ky është investimi që parashikohet të kryhet në veri të vendit, me fokus ndërhyrjet në rrugë në një nga zonat me potencial turistik në vend.

Banka Evropiane për Rindërtim dhe Zhvillim ka lidhur kontratën me vlerë prej rreth 3.63 mln euro me bashkimin e operatorëve BE -IS dhe Ergi shpk, që do të kryejë punimet në terren. Sipas të dhënave afati i përfundimit të punimeve është janari i vitit 2027.

Ndërhyrjet në këtë aks rrugor janë pjesë e projektit për Infrastrukturën dhe Turizmin në Shqipëri, që financohet nga Bashkimi Evropian nëpërmjet asistencës teknike dhe granteve të investimeve në një shumë totale prej 40 milionë euro, si dhe nga kredia sovrane plotësuese 60 mln euro e dhënë nga BERZH për qeverinë shqiptare. Projekti zbatohet nga Fondi Shqiptar i Zhvillimit, teksa më herët janë lidhur edhe kontrata të tjera të ngjshshme.

Një prej tyre është kontrata me vlerë 1.52 mln euro për rehabilitimin e segmentit rrugor nga rrethrrotullimi i Sop-it deri në Urën e Darzezës. Rruga ndodhet në zonën e Semanit dhe fillon në kryqëzimin me Rrugën Kombëtare Fier - Vlorë, rrethi Apollonia, vazhdon përgjatë segmentit rrugor Hoxharë dhe përfundon në Urën e re të Darzezës.

Paralelisht, në kuadër të këtij programi BERZH ka zhvilluar edhe tenderë për përmirësimin e rrjetit elektrik në Alpet e Shqipërisë, duke synuar rritjen e aksesit në energji elektrike në këtë zonë. /Scantv

Më të lexuarat